Aurstad har fått tildelt kontrakten for gjennomføring av trafikksikringstiltak langs Fv. 5028 Kaldestadvegen i Kvinnherad kommune.

Prosjektet vert gjennomført for Vestland fylkeskommune i perioden 2026–2027, med ei byggetid på om lag eitt år. Strekninga er om lag 825 meter lang, og skal rustast opp for å gi eit tryggare og meir oversiktleg tilbod for mjuke trafikantar.

I dag har delar av strekninga avgrensa løysingar for gåande og syklande. Prosjektet omfattar etablering av gang- og sykkelveg og fortau, i tillegg til fleire trafikksikringstiltak.

Det skal mellom anna gjennomførast:

• Siktutbetringar og justering av svingar
• Reduksjon i talet på avkøyrsler
• Nytt VA-anlegg
• Ny gatebelysning
• Terrengtilpassingar langs traseen

Tiltaka vil samla sett gi ei tryggare ferdsle og eit meir oversiktleg trafikkbilete for både mjuke trafikantar og bilistar.

Prosjektet krev særlege omsyn til natur og omgjevnader. Langs traseen er det registrert hule eiker og område med førekomst av vipe. Dette inneber sesongvise restriksjonar på delar av arbeidet, særleg knytt til hekketid.

Det skal òg takast omsyn til dyrka mark og eksisterande terreng i planlegging og gjennomføring.

Administrerande direktør Jo Stian Tverberg meiner prosjektet er godt tilpassa kompetansen i selskapet:

– Dette er eit prosjekt som kombinerer klassisk vegbygging med teknisk infrastruktur og tydelege krav til gjennomføring i sårbare område. Vi har brei erfaring med tilsvarande oppdrag og med å gjennomføre prosjekt der omsyn til både trafikksikkerheit, framdrift og naturmangfald står sentralt. Det gjer oss godt rusta til å levere eit trygt og solid prosjekt på Kaldestadvegen, seier Tverberg.

Vi ser fram til å setje i gang arbeidet til våren.

For å få eit innblikk i Aurstad-livet, følg oss gjerne på Facebook for fleire oppdateringar frå prosjekta våre.