Aurstad skal byggje nytt kraftverk
Føssaberget kraftverk i Vang i Valdres har fått grønt lys for utbygging, og Aurstad er tildelt totalentreprisen for prosjektet.
Ansvar for prosjektering og bygging
Prosjektet er utvikla av Clemens Kraft, som er byggherre i prosjektet, og omfattar bygging av eit nytt vasskraftverk i Storåne i Begnavassdraget.
Føssaberget kraftverk skal byggjast i Vang i Valdres, om lag 450 meter over havet. Kraftverket vil nytte eit fall på rundt 24 meter i Storåne og er planlagt med ein årleg produksjon på om lag 18 GWh. Det tilsvarar straumforbruket til rundt 1 000 husstandar.
Aurstad har fått oppdraget som totalentreprenør etter kontraktstandarden NS 8407, og vil ha ansvar for både prosjektering og bygging av anlegget.
– Vi er svært glade for å få denne kontrakten. Føssaberget kraftverk er eit viktig prosjekt for fornybar kraftproduksjon i regionen, og vi ser fram til å starte arbeidet saman med Clemens Kraft, seier Jo Stian Tverberg, administrerande direktør i Aurstad.
Fleire tiltak
Blant arbeida som skal gjennomførast, er bygging av ein inntaksdam i betong med tilhøyrande inntakskonstruksjonar. Elvevatnet skal leiast til inntaket gjennom etablering av ein 63 meter lang terskeldam bygd i kurve. Frå inntaksdammen skal vatnet førast ned til kraftstasjonen gjennom ein om lag 750 meter lang tunnel, som vi skal drive fram gjennom hausten. Frå tunnelløpet skal vatnet førast vidare i ei 120 meter lang røyrgate ned til kraftstasjonen. Denne røyrgata skal gravast ned og vil såleis vere skjult i terrenget.
Prosjektet omfattar også etablering av tekniske installasjonar knytte til kraftverket, samt nettilknyting til straumnettet. Heile utbyggingsstrekket vil vere om lag 1,5 km.
Tilrettelegging i området
Utbygginga inneber også fleire tiltak i terrenget rundt kraftverket.
Det skal etablerast rundt 350 meter med ny tilkomstveg i området, samtidig som om lag 150 meter eksisterande veg skal rustast opp. Inntakssystemet vil òg ha ei omløpsordning for fiskevandring. Her vil det bli lagt til rette for både opp- og nedvandring av fisk. Å oppretthalde fiskevandring er viktig i samband med realiseringa av prosjektet.
Vassvegen i prosjektet vil i hovudsak gå i tunnel, noko som reduserer inngrepa i terrenget langs elva.
Overskotsmassar frå tunneldriving og anna utgraving vert deponerte i eit godkjent massedeponi i direkte nærleik til anlegget. Transporten av massar vert difor minimal, noko som er positivt for naturen og det omliggande miljøet.
To års byggetid
Begnavassdraget er eit av dei større vassdraga i Sør-Noreg, med tilsig frå fjellområda i Valdres og Jotunheimen før elva Begna renn vidare sørover. Arbeidet med kraftverket er planlagt med ei byggetid på om lag to år. Når anlegget står ferdig, vil det bidra med ny, fornybar kraftproduksjon i Valdres-regionen.
Aurstad har gjennom fleire år opparbeidd seg brei erfaring med bygging av kraftanlegg og andre komplekse infrastrukturprosjekt. Mannskapet sett i gang med arbeidet allereie denne veka.
– Aurstad har brei erfaring med bygging av kraftanlegg og andre komplekse anleggsprosjekt. Prosjekt som dette passar godt med kompetansen vår innan tunnelarbeid, betongkonstruksjonar og tekniske installasjonar, seier Tverberg.
Kontrakten for Føssaberget kraftverk styrkjer selskapet si satsing innan energirelaterte prosjekt og gir eit solid prosjekt i porteføljen dei komande åra.
– Vi ser fram til eit godt samarbeid med Clemens Kraft i gjennomføringa av prosjektet. Målet vårt er å levere eit effektivt og solid kraftanlegg som vil produsere rein energi i mange år framover, avsluttar ein fornøgd Tverberg.
Følg oss på Facebook for fleire nyheiter, ledige stillingar og eit godt innblikk i Aurstad-livet.
